رسائی کے لنکس

مزید

لائیو بلاگ پاکستان میں کرونا سے متاثرہ زیرِ علاج افراد کی تعداد82 ہزار سے متجاوز، مزید 17 اموات

آخری بار اپڈیٹ کیا گیا جنوری 23, 2022

کراچی میں کرونا ٹیسٹ مثبت آنے کی شرح 40 فی صد سے زائد

پاکستان کی وزارتِ صحت نے ملک کے 15 شہروں کے اعداد و شمار جاری کیے ہیں جن کے مطابق سب سے زیادہ تیزی سے وبا کراچی میں پھیل رہی ہے۔

وزارتِ صحت کا کہنا ہے کہ کرونا کی اومیکرون قسم بہت تیزی سے پھیل رہی ہے۔

اعداد و شمار کے مطابق کراچی میں ٹیسٹ مثبت آنے کی شرح 40.68 فی صد رہی اور گزشتہ 24 گھنٹوں میں 1944 نئے کیسز سامنے آئے۔

کراچی کے بعد پاکستان کے زیرِ انتظام کشمیر کے دارالحکومت مظفر آباد میں ٹیسٹ سب سے زیادہ مثبت آ رہے ہیں۔ مظفر آباد میں ٹیسٹ مثبت آنے کی شرح 29.41 فی صد، اس کے بعد پشاور میں 23.89 فی صد، پھر اسلام آباد میں 22.30 فی صد، اس کے بعد حیدر آباد میں 21.53 فی صد جب کہ لاہور میں 15.83 فی صد کی شرح سے ٹیسٹ مثبت آ رہے ہیں۔

واضح رہے کہ گزشتہ 24 گھنٹوں میں کراچی کے بعد سب سے زیادہ 1836 کیسز وفاقی دارالحکومت اسلام آباد میں سامنے آئے ہیں۔ جب کہ لاہور میں 1175 افراد کے وبا سے متاثر ہونے کی تصدیق ہوئی۔

15:35

پاکستان میں اموات میں اضافہ

پاکستان میں کرونا وائرس سے اموات میں اضافہ ہوتا جا رہا ہے۔

سرکاری اعداد و شمار کے مطابق گزشتہ 24 گھنٹوں میں وبا سے مزید 17 افراد ہلاک ہوئے ہیں جس کے بعد اموات کی مجموعی تعداد 29 ہزار 122 ہو گئی ہیں۔

اعداد و شمار کے مطابق ملک میں گزشتہ ماہ اموات کی شرح یومیہ چار سے پانچ تھی جب کہ رواں میں ماہ اس میں اضافہ ہوا ہے۔ گزشتہ ہفتے سے اموات کی شرح بڑھ کر یومیہ آٹھ تک پہنچی تھی جب کہ رواں ہفتے یہ یومیہ 10 اموات سے تجاوز کر گئی ہے۔

15:18

'عالمی وبا کے نام پر ڈکٹیٹرشپ قبول نہیں'؛ امریکہ اور یورپ میں احتجاج

ایسے میں جب یورپ، امریکہ اور دنیا بھر کی حکومتیں عالمی وبا کرونا وائرس کی نئی قسم اومیکرون پر قابو پانے کی کوشش کر رہی ہیں۔ یورپ کے اہم شہر برسلز اور امریکہ کے دارالحکومت واشنگٹن ڈی سی میں ویکسی نیشن کے خلاف بڑے پیمانے پر مظاہرے ہوئے ہیں۔

برسلز میں پولیس نے کرونا ویکسی نیشن اور پابندیوں کے خلاف اتوار کو مظاہرہ کرنے والے لگ بھگ 50 ہزار مظاہرین کو منشتر کرنے کے لیے واٹر گن اور آنسو گیس کا استعمال کیا۔

برسلز میں ہونے والے احتجاج میں مظاہرین میں سے کچھ فرانس، جرمنی اور دیگر ممالک سے آئے تھے اور وہ یورپی یونین کے ہیڈ کوارٹرز کی حیثیت رکھنے والے شہر میں مارچ کرتے ہوئے آزادی کے نعرے لگا رہے تھے۔

ویڈیوز میں کچھ سیاہ پوش مظاہرین کو یورپی یونین کی سفارتی سروسز انجام دینے والوں کے زیر استعمال عمارت پر حملہ کرتے اور اس کے داخلی دروازے پر آتش گیر گولے پھینکتے ہوئے دکھایا گیا۔

احتجاج میں شریک بعض مظاہرین نعرے لگا رہے تھے کہ 'عالمی وبا کے نام پر ڈکٹیٹرشپ مسلط کر دی گئی ہے'۔

مزید جانیے

15:17

کرونا سے متاثر ہونے پر پھیپھڑوں کی پیوند کاری کرانے والے امریکی کی کہانی

ایسے مریض جن کے پھیپھڑوں کو کرونا وائرس سے شدید نقصان پہنچا ہو، کا صحت یاب ہونا معجزہ سمجھا جاتا ہے البتہ اب امریکہ سمیت دنیا کے کئی ممالک میں کرونا سے متاثر ایسے لوگوں کے پھیپھڑوں کی پیوند کاری کی جا رہی ہے۔ ایک ایسے ہی مریض کے بارے میں جانتے ہیں 'لائف 360' میں صبا شاہ خان سے۔

15:12

پاکستان میں کرونا سے مزید چھ ہزار افراد متاثر

پاکستان میں کرونا وائرس سے مزید چھ ہزار افرادکے متاثر ہونے کی تصدیق ہوئی ہے۔

سرکاری اعداد و شمار کے مطابق گزشتہ 24 گھنٹوں میں ملک بھر میں ساڑھے 49 ہزار ٹیسٹ کیے گئے جن کے مثبت آنے کی شرح 12.81 فی صد رہی۔

اعداد و شمار کے مطابق ملک بھر میں مزید چھ ہزار 357 افراد متاثر ہوئے ہیں یوں متاثر افراد کی مجموعی تعداد 13 لاکھ 81 ہزار ہو گئی ہے جب کہ 12 لاکھ 69 ہزار افراد صحت یاب ہو چکے ہیں۔

حکام کے مطابق کرونا سے متاثرہ 12سو افراد انتہائی نگہداشت میں ہیں۔

14:28

نیوزی لینڈ میں پابندیاں؛ جیسنڈا آرڈن نے شادی منسوخ کر دی

فائل فوٹو
فائل فوٹو

نیوزی لینڈ کی وزیر اعظم جیسنڈا آرڈن نے ملک میں کرونا پابندیوں کی وجہ سے اپنی شادی منسوخ کرنے کا فیصلہ کیا ہے۔

خبر رساں ادارے 'رائٹرز' کے مطابق جیسنڈا آرڈن نے اتوار کو صحافیوں سے گفتگو کرتے ہوئے کہا کہ انہوں نے ملک میں کرونا کے اومیکرون ویریئنٹ کے پھیلاؤ کو مدِ نظر رکھتے ہوئے اپنی شادی منسوخ کرنے کا فیصلہ کیا ہے۔

نیوزی لینڈ میں اتوار کی رات سے نئے قوانین کا نفاذ کیا جائے گا جس میں اجتماعات کو محدود کرنے اور ماسک کو لازم قرار دیا گیا ہے۔

ملک میں نئی پابندیوں کا نفاذ اس وقت سامنے آیا ہے جب ایک شادی کی تقریب کے بعد کرونا کے اومیکرون ویریئنٹ کے نو کیسز رپورٹ ہوئے۔

13:14 23.1.2022

بھارت میں مثبت کیسز کی شرح 17 اعشاریہ سات آٹھ فی صد

بھارت میں کرونا وائرس کے یومیہ مثبت کیسز کی شرح 17 اعشاریہ سات آٹھ فی صد رہی ہے۔

بھارت کی وزارتِ صحت کی جانب سے جاری اعداد و شمار کے مطابق ملک میں اتوار کو کرونا کے تین لاکھ 33 ہزار 533 نئے کیسز رپورٹ ہوئے ہیں۔

ملک میں گزشتہ 24 گھنٹوں کے دوران 525 مریض جان کی بازی ہار گئے ہیں۔

بھارت میں کرونا سے دو لاکھ 59 ہزار 168 مریض صحت یاب بھی ہوئے ہیں۔

13:08 23.1.2022

پاکستان: ساڑھے سات ہزار سے زائد کیسز رپورٹ

پاکستان میں اتوار کو کرونا وائرس کے ساڑھے سات ہزار سے زائد نئے کیسز رپورٹ ہوئے ہیں۔

سرکاری اعداد و شمار کے مطابق پاکستان میں گزشتہ 24 گھنٹوں کے دوران 58 ہزار 334 ٹیسٹ کیے گئے جن میں سے سات ہزار 586 افراد میں کرونا کی تصدیق ہوئی ہے۔

ملک میں کرونا وائرس کے مثبت کیسز کی شرح 13 فی صد رہی جب کہ 20 افراد جان کی بازی ہار گئے ہیں۔

پاکستان میں کرونا سے متاثرہ ایک ہزار 83 مریض انتہائی نگہداشت کے وارڈ میں زیرِ علاج ہیں۔

13:01 23.1.2022

پاکستان: مثبت کیسز کی شرح 13 فی صد تک پہنچ گئی

فائل فوٹو
فائل فوٹو

پاکستان میں گزشتہ چوبیس گھنٹوں کے دوران کرونا وائرس کے شکار مزید 23 مریض دم توڑ گئے ہیں جب کہ 961 مریضوں کی حالت تشویش ناک بتائی جاتی ہے۔

وزارت نیشنل ہیلتھ سروس کے اعداد و شمار کے مطابق گزشتہ چوبیس گھنٹوں کے دوران 59 ہزار 343 افراد کے کرونا ٹیسٹ کیے گئے جن میں سے 7678 افراد میں وائرس کی تشخیص ہوئی ہے۔

پاکستان میں مثبت کیسز کی شرح میں بدستور اضافہ ہو رہا ہے اور یہ شرح 12 اعشاریہ نو تین فی صد تک پہنچ گئی ہے۔

12:01 21.1.2022

بھارتی کشمیر: ایک ہفتے میں کرونا وائرس کے 28 ہزار سے زائد کیس، 34 ہلاکتیں

بھارت کے زیرِ انتظام کشمیر میں کرونا وائرس کے مثبت کیسز میں ایک مرتبہ پھر تیزی کے ساتھ اضافہ ہو رہا ہے۔

حکام کا کہنا ہے کہ اس وبا کی تیسری لہر نے علاقے کو تقریباً گھیرے میں لے لیا ہے اور اگر احتیاط نہیں برتی گئی تو صورتِ حال مزید خراب ہو سکتی ہے۔

سرکاری اعداد و شمار کے مطابق جموں و کشمیر میں گزشتہ ایک ہفتے کے دوراں کرونا وائرس کے 28 ہزار چار سو نئے کیسز سامنے آئے ہیں جب کہ 34 افراد جان کی بازی ہار گئے ہیں۔

جمعرات کو مزید چھ ہزار کیس رپورٹ ہوئے ہیں جن میں 1300 دارالحکومت سرینگر سے سامنے آئے ہیں۔

حکام کا کہنا ہے کہ اگر کیسز اسی رفتار سے بڑھتے رہے تو نئی پابندیاں لگائی جا سکتی ہیں۔

20:50 20.1.2022
مزید
Previous slide
Next slide
مزید

XS
SM
MD
LG