رسائی کے لنکس

logo-print
مزید

لائیو بلاگ پاکستان میں یومیہ کیسز کی تعداد ایک ہزار سے کم، سندھ میں چھٹی تا آٹھویں جماعت کی کلاسز کا آغاز

آخری بار اپڈیٹ کیا گیا جون 15, 2021

'کرونا کیسز میں کمی خوش آئند ہے، لیکن ہلاکتوں میں اتنی تیزی سے کمی نہیں ہو رہی'

فائل فوٹو
فائل فوٹو

صحت کے عالمی ادارے (ڈبلیو ایچ او) نے کہا ہے کہ متواتر سات ہفتوں سے کووڈ 19 کے نئے کیسز کی تعداد میں کمی واقع ہو رہی ہے، لیکن افریقہ میں وائرس تیزی سے پھیل رہا ہے اور لوگ ہلاک ہو رہے ہیں۔

جنیوا میں ادارے کے صدر دفتر سے پیر کو جاری بیان میں ڈبلیو ایچ او کے ڈائریکٹر جنرل ٹیڈروس گیبراسس نے کہا کہ نئے کیسز میں مجموعی کمی یقینی طور پر ایک خوش آئند خبر ہے۔ لیکن مجموعی طور پر ہلاکتوں میں اتنی تیزی سے کمی واقع نہیں ہو رہی ہے۔ البتہ، اس میں گزشتہ ہفتے معمولی کمی ضرور دکھائی دی ہے۔

ٹیڈروس نے کہا کہ کرونا کیسز میں کمی کا معاملہ ابھی واضح نہیں چوں کہ افریقہ جیسے علاقوں میں یہ وبا پھیل رہی ہے اور ہلاکتیں بھی واقع ہو رہی ہیں؛ جہاں ویکسین، علاج، آکسیجن اور تشخیصی آلات تک رسائی محدود ہے۔

انہوں نے برطانوی طبی جریدے 'دی لینست' میں شائع ہونے والے ایک حالیہ مطالعے کا حوالہ دیا، جس سے پتا چلتا ہے کہ عالمی سطح پر افریقہ میں کووڈ 19 کے ایسے مریضوں کی تعداد زیادہ ہے جو شدید بیمار ہیں اور جہاں زیادہ ہلاکتیں ہو رہی ہیں، حالاں کہ دیگر علاقوں کے مقابلے میں یہاں کے مصدقہ کیسز کی تعداد کم رپورٹ ہوتی ہے۔

ڈبلیو ایچ او کے سربراہ نے بتایا کہ دستیاب ثبوت سے پتا چلتا ہے کہ نئے ویرینٹس کے سبب وبا کے عالمی پھیلاؤ میں خاصہ اضافہ ہوا ہے؛ خاص طور پر ان علاقوں میں جہاں ویکسی نیشن کا تناسب نسبتاً کم ہے اور ان افراد کے لیے خطرات زیادہ ہیں جنھیں ویکسین نہیں لگی۔

مزید پڑھیں:

12:45

پاکستان میں 838 نئے کیسز رپورٹ

پاکستان میں گزشتہ 24 گھنٹوں کے دوران 35 ہزار 39 ٹیسٹ کیے گئے، جس میں سے 838 افراد میں وائرس کی تشخیص ہوئی ہے۔

سرکاری اعداد و شمار کے مطابق ملک میں مثبت کیسز کی شرح دو اعشاریہ تین نو فی صد ریکارڈ کی گئی ہے۔

پاکستان میں گزشتہ چوبیس گھنٹوں کے دوران کرونا سے مزید 59 افراد کی ہلاکتیں سامنے آئی ہیں۔

ملک میں کرونا سے اب تک نو لاکھ 43 ہزار 27 افراد متاثر ہو چکے ہیں، جب کہ وائرس سے ہونے والی مجموعی ہلاکتوں کی تعداد 21 ہزار 782 ہے۔

11:25

بھارت: ڈھائی ماہ بعد کم ترین کیسز

بھارت میں منگل کو ڈھائی ماہ بعد کرونا کے کم ترین کیسز رپورٹ ہوئے ہیں۔

وزارت صحت کی جانب سے جاری اعداد و شمار کے مطابق ملک میں 24 گھنٹوں کے دوران 60 ہزار 471 افراد متاثر ہوئے ہیں۔

سرکاری اعداد و شمار کے مطابق ملک میں مثبت کیسز کی شرح تین اعشاریہ چار پانچ فی صد ریکارڈ کی گئی ہے، جب کہ چوبیس گھنٹوں کے دوران دو ہزار 726 ہلاکتیں سامنے آئی ہیں۔

11:23

کرونا 'لیب لیک' نظریے پر چین کا احتجاج، امریکہ پر معاملے کو سیاسی رنگ دینے کا الزام

فائل فوٹو
فائل فوٹو

چین نے ان میڈیا رپورٹس کو مسترد کر دیا ہے، جن میں کرونا وائرس کے کسی لیبارٹری سے لیک ہونے کا خدشہ ظاہر کیا گیا تھا۔

چین نے ایسی میڈیا رپورٹس کی وجہ سے امریکہ پر الزام عائد کیا ہے کہ واشنگٹن کرونا وائرس کی عالمی وبا کی ابتدا سے متعلق معاملے کو سیاسی رنگ دے رہا ہے اور امریکہ کو چین کے اندرونی معاملات میں مداخلت بند کرنی چاہئے۔

ایسوسی ایٹڈ پریس کی ایک رپورٹ کے مطابق، یہ بات جمعے کے روز چینی خارجہ پالیسی کے ایک سینئیر مشیر یانگ جی ایچی اور امریکی خارجہ سیکرٹری اینٹنی بلنکن کے درمیان ٹیلی فون پر بات چیت کے بعد سامنے آئی ہے۔

خبر رساں ادارے ایسوسی ایٹڈ پریس کے مطابق، بات چیت کے دوران دونوں ممالک میں ہانگ کانگ میں آزادیوں کو محدود کرنے اور شمال مغربی چینی صوبے سنکیانگ میں ویغور مسلمانوں کو بڑے پیمانے پر حراست میں لیے جانے جیسے معاملات پر اختلاف رائے ابھر کر سامنے آیا۔

کرونا وائرس کی وبا کی ابتدا سے متعلق مزید تحقیقات کے مطالبات، چین کے لیے اس لیے باعث تشویش ہیں کہ پہلے ہی خیال کیا جاتا ہے کہ کرونا وائرس کی ابتدا چین میں ووہان میں واقع لیبارٹری سے لیک ہونے سے ہوئی ہے۔ ایسی رپورٹوں پر چین کی جانب سے سخت ردعمل دیکھنے میں آ رہا ہے۔

مزید پڑھیے:

11:00

کرونا کے سائے میں کوپا امریکہ فٹ بال ٹورنامنٹ کا آغاز

کرونا وائرس کے خدشات کے باوجود برازیل میں کوپا امریکہ فٹ بال ٹورنامنٹ کا آغاز ہو گیا ہے۔ ایونٹ کے افتتاحی میچ میں میزبان اور دفاعی چیمپئن برازیل نے وینزویلا کو تین صفر سے شکست دی۔

وینزویلا کے اسکواڈ میں شامل آٹھ کھلاڑیوں کے ہفتے کو کرونا ٹیسٹ مثبت آنے کے بعد مزید 15 کھلاڑیوں کو ہنگامی طور پر بلا لیا گیا ہے۔ کوپا امریکہ میں ناک آؤٹ مرحلے کا آغاز تین جولائی سے ہو گا اور ایونٹ کا فائنل 10 جولائی کو میراکانا اسٹیڈیم میں کھیلا جائے گا۔

دو سال قبل اسی گراؤنڈ میں کوپا امریکہ کے فائنل میچ میں برازیل نے پیرو کو ایک کے مقابلے میں تین گول سے شکست دے کر نویں مرتبہ ٹائٹل اپنے نام کیا تھا۔

13:15 14.6.2021

سندھ میں چھٹی سے آٹھویں تک کی کلاسز کھولنے کا فیصلہ

سندھ کے وزیرِ تعلیم سعید غنی نے کہا ہے کہ کرونا کی صورتِ حال کو دیکھتے ہوئے منگل سے چھٹی سے آٹھویں جماعت تک کے لیے اسکول کھولنے کا فیصلہ کیا گیا ہے۔

اپنے ایک ٹوئٹ میں انہوں نے کہا کہ سندھ کرونا ٹاسک فورس کے اجلاس میں چھٹی سے آٹھویں تک کی کلاسز منگل 15 جون سے پچاس فی صد حاضری کے ساتھ کھولنے کا فیصلہ کیا گیا ہے۔

سعید غنی نے کہا کہ کرونا کی صورتِ حال میں مزید بہتری کی صورت میں پرائمری کلاسز 21 جون سے شروع کردی جائیں گی۔

ان کے بقول، اسکولوں کے سارے عملے کو ویکسین لگوانا لازمی ہو گا۔

11:17 14.6.2021

بھارت میں کرونا کیسز میں کمی، اموات تین ہزار 900 سے زائد

بھارت میں کرونا وائرس کے کیسز میں کمی آئی ہے البتہ اموات کی تعداد اب بھی چار ہزار کے قریب ریکارڈ کی گئی ہے۔

سرکاری اعداد و شمار کے مطابق پیر کو بھارت میں کرونا وائرس کے 70 ہزار 421 نئے مریض رپورٹ ہوئے جس کے بعد مجموعی کیسز دو کروڑ 95 لاکھ 10 ہزار 410 ہوگئے ہیں۔

بھارت میں کرونا وائرس سے مزید تین ہزار 921 مریض ہلاک بھی ہوئے ہیں۔ ملک میں مجموعی ہلاکتیں تین لاکھ 74 ہزار 305 تک پہنچ گئی ہیں۔

ملک میں کرونا وائرس سے سب سے زیادہ متاثرہ ریاست مہاراشٹرا ہے جہاں کرونا کیسز کی تعداد 59 لاکھ سے زائد ہے۔

09:57 14.6.2021

برطانیہ میں کرونا پابندیوں کے خاتمے میں تاخیر کا اعلان متوقع

فائل فوٹو
فائل فوٹو

برطانیہ میں کرونا وائرس کی قسم 'ڈیلٹا' کے پھیلاؤ میں تیزی کے بعد پیدا ہوتے تحفظات کے باعث کرونا وائرس کی عائد پابندیوں کے خاتمے میں تاخیر کا امکان ہے۔

خبر رساں ادارے 'رائٹرز' کے مطابق برطانوی وزیرِاعظم کی جانب سے پیر کو اس بات کا اعلان متوقع ہے کہ کووڈ 19 کی پابندیوں کے خاتمے میں تاخیر کی جائے گی۔

واضح رہے کہ فروری میں بورس جانسن کی جانب سے پیش کردہ روڈ میپ کے تحت حکومت نے یہ اشارہ دیا تھا کہ کرونا کے پھیلاؤ کو روکنے کے لیے لگائی گئی تمام سماجی پابندیاں 21 جون سے پہلے ہٹا لی جائیں گی اور پبز، کلبز اور دیگر اس طرح کے مقامات مکمل کھولے جاسکتے ہیں۔

البتہ حالیہ ہفتوں کے دوران برطانیہ میں بھارت میں سب سے پہلے تشخیص ہونے والی کرونا وائرس کی قسم 'ڈیلٹا' کے نئے کیسز میں تیزی سے اضافہ دیکھا گیا ہے۔ صحت کے حکام کا ماننا ہے کہ یہ قسم گزشتہ قسم سے 60 فی صد زیادہ تیزی سے منتقل ہوتی ہے اور سائنس دانوں نے تیسری لہر سے خبردار بھی کیا ہے۔

بورس جانسن نے کہا کہ حالیہ دنوں میں انفیکشن اور اسپتال میں داخلوں کی تعداد میں اضافہ 'سنگین تشویش' کا باعث ہے۔

09:51 14.6.2021

نئی دہلی میں کرونا پابندیوں میں نرمی

فائل فوٹو
فائل فوٹو

بھارت میں کرونا وائرس کے کیسز میں کمی کے بعد دارالحکومت نئی دہلی میں لگائی گئی پابندیوں میں نرمی کردی گئی ہے۔

بھارتی ذرائع ابلاغ کے مطابق دہلی کے وزیرِاعلیٰ اروند کیجری وال نے اتوار کو ایک پریس کانفرنس میں کہا کہ دارالحکومت میں عبادت گاہیں پیر سے کھولنے کی اجازت ہو گی لیکن ابھی زائرین کو آنے کی اجازت نہیں ہو گی۔

ان کے بقول دارالحکومت میں پچاس فی صد بیٹھنے کی گنجائش کے ساتھ ریستوران بھی کھولے جا سکیں گے۔

دہلی میں کرونا کی پابندیوں میں نرمی کا اعلان کرتے ہوئے بتایا گیا کہ صبح 10 سے رات آٹھ بجے تک تمام مالز کھولے جائیں گے۔ اس کے علاوہ سیلونز، بیوٹی پارلرز اور نائی کی دکانوں کو بھی دوبارہ کھولنے کی اجازت دی گئی ہے۔

البتہ دارالحکومت میں اسکول، کالج اور کوچنگ انسٹی ٹیوٹ 21 جون تک بند رہیں گے، جب کہ جمز، اسپا، سوئمنگ پول، بینکوئٹ ہال، امیوزمنٹ پارکس، سنیما ہال، تھیٹر اور عوامی پارک بھی بند رہیں گے۔

09:12 14.6.2021

پاکستان میں کرونا سے مزید 34 افراد ہلاک

پاکستان میں کرونا وائرس کے پھیلاؤ میں بتدریج کمی آ رہی ہے۔ ملک میں گزشتہ 24 گھنٹوں میں مثبت کیسز کی شرح ڈھائی فی صد ریکارڈ کی گئی ہے۔

سرکاری اعداد و شمار کے مطابق ملک میں گزشتہ 24 گھنٹوں میں 39 ہزار 214 ٹیسٹ کیے گئے جس میں ایک ہزار 19 میں کرونا وائرس کی تشخیص ہوئی۔

ملک میں کرونا کی عالمی وبا سے مزید 34 افراد ہلاک بھی ہوئے ہیں۔

پاکستان میں کرونا وائرس کے مجموعی کیسز کی تعداد نو لاکھ 42 ہزار 189 ہے جس میں سے آٹھ لاکھ 78 ہزار 740 صحت یاب ہوئے ہیں جب کہ ہلاک افراد کی مجموعی تعداد 21 ہزار 723 ہے۔

08:34 14.6.2021
مزید
Previous slide
Next slide
مزید

XS
SM
MD
LG